O rexistro galego de vivenda protexida roza os 18.000 demandantes

   A Xunta busca duplicar o parque público residencial até chegar aos 8.000 inmobles; pola súa banda, Bruxelas quere pasos "palpables"

   SANTIAGO DE COMPOSTELA, 13 Oct. (EUROPA PRESS) -

   O rexistro galego de vivenda protexida roza os 18.000 demandantes, deles case un terzo (32,2%) correspondentes a Vigo e un 16,9% na Coruña cidade, de acordo cos datos actualizados do Instituto Galego de Vivenda e Solo (IGVS) que recolle Europa Press.

   Este rexistro, que pretende ser un procedemento "áxil e transparente" para a adxudicación das vivendas, supera desde hai anos os 15.000 demandantes e alcanza agora a cifra de 17.957 persoas, a data do 11 de outubro.

   Por provincias, Pontevedra leva a maioría con 8.550, incluídas as 5.791 demandas en Vigo; séguelle A Coruña con 6.291 persoas inscritas no rexistro. Con cifras máis baixas sitúanse Lugo (2.017) e Ourense (1.099).

   Se Vigo supón case un terzo da demanda, na Coruña a cifra de demandantes alcanza as 3.040 (16,9% do total). Lugo (1.201) supera a Santiago de Compostela (1.162) e Pontevedra cidade non chega ao milleiro (977).

   No tocante ás sete grandes cidades, tampouco alcanzan os 1.000 demandantes Ourense cidade (648) e Ferrol (494). Do resto de localidades, destaca Mos, con 319 demandas.

    Segundo a Xunta, o rexistro de demandantes de vivenda pretende ser un instrumento válido e veraz para ter datos fiables sobre a demanda real de vivendas protexidas en cada localidade, ao coñecer o número de demandantes existentes para cada réxime de vivenda.

XUNTA E GOBERNO

   Neste contexto, a Xunta busca avanzar no compromiso de duplicar o parque público residencial na presente lexislatura até chegar aos 8.000 inmobles e facilitar o acceso á vivenda á poboación, en especial aos colectivos máis vulnerables.

   O anuncio realizouno esta semana no Parlamento o presidente galego, Alfonso Rueda, quen asegurou que o Goberno autonómico triplicará en 2025 o orzamento destinado a chan residencial e á construción de vivendas públicas até chegar a 126 millóns de euros.

   Pola súa banda, a ministra de Vivenda, que esta semana visitou A Coruña, durante un acto no centro de FP de Someso reivindicou estar "a traballar coas comunidades autónomas", aínda que "a máquina de facer diñeiro non existe".

   Nun escenario no que a nova Comisión Europea está a constituírse, a ministra valorou que a presidenta "deu resposta á demanda dos socialdemócratas de crear unha carteira de vivenda". "Temos confianza en conseguir a xestión dos fondos e España conseguiu que eses fondos estean hoxe en Galicia, na FP na vivenda, na industria, axudando á prosperidade dun país", sinalou.

COMISIÓN EUROPEA

   Pola súa banda, a Comisión quere dar pasos "palpables concretos e eficaces" en materia de vivenda para desempeñar un papel máis relevante neste ámbito, pero sen deixar de respectar os principios de "subsidiariedade e proporcionalidade".

   Neste sentido, pretende "apoiar e non substituír" tanto aos Estados membro como aos entes locais, que seguirán tendo as principais competencias.

   Así o indicou este mércores o vicepresidente da Comisión e responsable de Promoción de Modo de Vida, Margaritis Schinas, durante a súa intervención nun debate sobre vivenda asequible na sede do Parlamento Europeo en Estrasburgo.