A oposición cuestionará a xestión de recursos públicos da Xunta na sesión de control dun pleno que terá dúas leis a debate
SANTIAGO DE COMPOSTELA, 20 Sep. (EUROPA PRESS) -
A comparecencia do presidente da Xunta, Alfonso Rueda, para avanzar as principais liñas dos orzamentos da Administración autonómica para 2023 será o prato principal da segunda sesión plenaria do curso político no Parlamento de Galicia, na que os grupos da oposición buscarán alcanzar unha posición unánime en defensa do sector do arrastre ante os plans de Bruxelas de vetar este tipo de pesca en caladoiros do Atlántico.
Este martes quedou configurado a orde do día do próximo pleno da Cámara autonómica, que terá lugar na última semana de setembro cun "amplo" e "denso" programa que inclúe o debate de dous textos lexislativos e dúas comparecencias, ademais dos bloques de iniciativas e sesión de control ao Goberno.
Sobre esta última, os portavoces da oposición --Ana Pontón (BNG) e Luís Álvarez (PSdeG)-- cuestionarán a xestión de recursos públicos da Xunta no seu careo con Alfonso Rueda, quen volverá ao hemiciclo no arranque da segunda xornada do pleno despois de protagonizar unha das comparecencias previstas.
Nela, o mandatario autonómico debullará o bosquexo no que traballa o Goberno galego para a elaboración das contas do próximo ano, para as que a Xunta aprobou un teito de gasto de 12.599 millóns de euros, un 8,2% superior ao montante do seu orzamento no actual exercicio.
A comparencia de Rueda dará paso a da conselleira do Mar, Rosa Quintana, que estará centrada en asunto que suscita o consenso de Goberno e os grupos políticos da Cámara: o rexeitamento aos plans de Bruxelas de vetar a pesca de arrastre en caladoiros do Atlántico.
Tanto a oposición como o grupo que sustenta ao Executivo autonómico comparten o seu apoio ao sector ante a "ameaza" que, din, supón a intención da Comisión Europea para "miles" de postos de traballo na cadea mar-industria.
Ademais da comparecencia de Quintana, o BNG quere que o Parlamento galego aprobe unha declaración institucional en apoio ao sector pesqueiro, mentres que o PP levará ante a Cámara unha iniciativa de impulso no mesmo sentidos.
DOUS TEXTOS LEXISLATIVOS
Antes da quenda de Rueda e a responsable de Pesca, a Cámara autonómica vivirá o debate de dous textos lexislativos. O primeiro está promovido pola Xunta e expón unha modificación normativa para facilitar a provisión de postos de "difícil cobertura" no Servizo Galego de Saúde a través do método do concurso.
Esta proposta lexislativa suscitou as críticas da oposicón pola forma na que chega na Cámara, xa que o fai por unha vía de urxencia que, segundo Olalla Rodil (BNG) e Luís Álvarez, non está xustificada.
Para o portavoz dos populares, Pedro Puy, estes argumentos son "contraditorios" porque chocan co discurso de que a Xunta toma "moito tempo" para solucionar os problemas de persoal no Sergas.
A outra das leis a debate será a tramitación do proxecto de lei para a implantación de áreas empresariais en Galicia, que encara xa os seus últimos trámites antes da súa aprobación definitiva.
BNG: "PÍRRICA" AXUDA AO MATERIAL ESCOLAR
O segundo careo do curso político entre Rueda e os portavoces da oposición terá no foco a xestión do recurso públicos por parte da Administración autonómica, un campo no que BNG e PSdeG coinciden en "suspender" ao goberno de San Caetano.
Así, segundo expuxo a nacionalista Olalla Rodil, a líder frontista porá o acento en que a "única medida" destacable da Xunta desde a chegada de Rueda á Presidencia en políticas sociais foi a retirada da Tarxeta Básica "que empuxou por centos de persoas á cola dos bancos de alimento" ou os "pírricos" 25 euros para material escolar anunciados o luns "nun tremendo acto propagandístico".
"Fronte á pomposidade coa que anuncia 25 euros para as familias no inicio de curso, o PP non escatima un euro para convidar os seus amigos aos palcos VIP de concertos", espetou Rodil en alusión ás 500 entradas retiradas pola Xunta para o concerto de C Tangana en Vigo, asunto polo que o Bloque preguntará ao Goberno durante o pleno.
Ademais, o BNG levará ao pleno outros asuntos, como unha petición para que o Executivo autonómico aumente o investimento en atención primaria, a articulación de axudas a vivenda ou instrumentos de apoio a gandeiros e agricultores para paliar os incrementos dos custos de produción pola crise de prezos.
PSDEG: FONDOS COVID
Pola súa banda, durante a sesión de control, Luís Álvarez instará a Rueda a explicar a xestión dos fondos Covid en materia sanitaria, un asunto no que, segundo o propio portavoz socialista, o presidente "ten unha papeleta".
"Non estamos a falar de cifras que se invente este grupo, como ás veces acúsanos. Son evidencias que presentan os informes do Consello de Contas", espetou Álvarez, que o pasado luns acusou á Xunta de "desviar" 159 millóns de euros procedentes destes fondos "a fins descoñecidos", asunto que pide investigar nunha comisión parlamentaria.
Así mesmo, os socialistas reclamarán no pleno que a Administración autonómica dea cobertura ás carencias que presenta o cadro do Instituto de Medicamento Legal de Galicia (Imelga) e denunciarán a "ausencia" da conselleira de Medio Ambiente, Ángeles Vázquez, durante a vaga de incendios deste verán que afectou a varios parques naturais da comunidade.
PP: SANIDADE E FONDOS NEXT XENE
Por último, o Grupo Popular promoverá, ademais da citada proposición non de lei que solicitará o apoio da Cámara ao sector da pesca de arrastre, outra iniciativa para ampliar as acreditacións dos profesionais da enfermaría no uso de medicamentos.
Na quenda de preguntas, como apuntou Puy, cuestionará ao Goberno autonómico sobre o estado dos proxectos "estratéxicos" financiados con fondos Next Generation e a postura sobre os cambios no regulamento de Costas.
Andalucía
