Rueda "descoñece" se hai máis denuncias do coche de Baltar e di que "non lle corresponde" decidir sobre un expediente

VIGO, 28 Abr. (EUROPA PRESS) -

O presidente da Xunta, Alfonso Rueda, asegurou este venres que "descoñece" a existencia de máis denuncias sobre o coche oficial do presidente da Deputación de Ourense, Manuel Baltar, e indicou que en todo caso "non lle corresponde" a el decidir sobre a apertura dun expediente informativo.

Así o sinalou o mandatario autonómico ante os medios de comunicación en Vigo, onde dixo coñecer as últimas informacións da prensa que apuntan a que o vehículo de Baltar acumularía varias denuncias.

"Vino nun medio, pero descoñezo se hai máis. O que falei co afectado foi sobre esta que saíu estes días. El recoñeceu que así era e onte recoñecía o erro e pedía desculpas públicas. Era o que tiña que facer e as consecuencias que se deriven tamén asumilas", engadiu Rueda.

Preguntado sobre as palabras da secretaria xeral do PP, Cuca Gamarra, que asegurou que o Partido Popular non pode amparar condutas que non se axustan ás normas polas que se rexe calquera cidadán, o presidente do Goberno galego indicou que todos os membros do PP "dixeron o mesmo".

"Creo que dixemos os dous o mesmo, aínda que haxa algunhas diferenzas. Escoitei á secretaria xeral do PP. Dixemos todos o mesmo, sen ningunha dúbida", reiterou.

Os medios de comunicación tamén cuestionaron sobre se o PP abrirá un expediente informativo a Baltar, como se recolle nos estatutos do partido ante presuntos delitos dolosos. Rueda explicou que este expediente ábrese "en función das circunstancias e do tipo de delitos".

"Estamos a falar do inicio dunhas actuacións xudiciais, nada máis. Hai que entender que se fala de expedientes informativos para determinadas circunstancias de moitísima gravidade, probablemente non se estea pensando neste tipo de actuacións. Pero non presumo nada porque non me correspondería a min tomar a decisión de abrir ese expediente", sentenciou.

Todo iso despois de que Baltar fose interceptado o pasado domingo nun coche oficial a 215 quilómetros por hora na A-52, á altura do municipio zamorano de Asturianos, en dirección Madrid. O dirixente ourensán pediu desculpas a través dunha misiva e atribuíu o exceso de velocidade a "un descoido" en "unha longa recta sen referencias".