Rueda espera que non haxa conflito de competencias co Goberno central pola nova lei galega do litoral

   Proclama que Galicia "ten todo o dereito do mundo" a xestionar a súa costa e sinala que o Estado aínda non contestou "por escrito"

   PONTEVEDRA, 16 Dic. (EUROPA PRESS) -

   O presidente da Xunta, Alfonso Rueda, espera que non haxa conflito de competencias co Goberno central pola nova lei galega de ordenación do litoral, en cuxa tramitación avanza o Executivo galego ante a negativa para transferirlle a competencia sobre as costas.

   "Espero que non", respondeu Alfonso Rueda ao ser preguntado polos xornalistas durante unha visita á residencia de Campolongo, en Pontevedra, pola posibilidade de que exista un novo choque de competencias co Estado. "Isto non vai contra ninguén, isto vai a favor de Galicia", xustificou o presidente, convencido que "desde Galicia é como mellor pódese xestionar algo tan importante".

   O titular da Xunta lembrou que, cando foi recibido na Moncloa polo presidente do Goberno, Pedro Sánchez, deixoulle o informe do Consello Consultivo de Galicia e da asesoría xurídica autonómica, no que se recollía que esta reivindicación "encaixaba perfectamente no ordenamento".

   Ademais, Rueda ofreceu "toda a colaboración" e asegurou que "todo isto se vai a facer respectando, como non podía ser doutra maneira, a normativa estatal".

   "Cremos que, do mesmo xeito que están a facer outras comunidades autónomas, a xestión do litoral pódese facer mellor desde aquí", reiterou o titular do Goberno galego, "porque estamos moito máis preto do territorio, entendemos mellor o que pasa, estamos máis en contacto con toda a problemática", engadiu.

"NINGUNHA NOTIFICACIÓN"

   O presidente da Xunta explicou que non houbo "ningunha contestación por escrito" sobre este asunto. "Díxosenos que non podía ser e o único que estamos a facer é avanzar, vendo que cada vez son máis as empresas que piden prórrogas nas concesións e non obteñen resposta", alegou.

   Ademais de dar seguridade xurídica aos titulares de instalacións que licitamente están en dominio público marítimo-terrestre, Alfonso Rueda tamén citou a existencia de moitas edificacións en ruínas na costa galega.

   "E isto facémolo tamén por preservar o noso litoral", en referencia a intención de "blindar" aquelas zonas nas que "non debería permitirse ningunha actividade".

   Rueda lembrou que Galicia é a comunidade "con máis quilómetros de costa de España" e, unha vez se aprobe esta lei, poderá regular a súa franxa costeira. "Creo que Galicia ten todo o dereito do mundo a pedir xestionar o noso litoral do mesmo xeito que están a facer outras comunidades autónomas", sinalou o presidente.

   "Espero sinceramente que o Goberno central o entenda, igual que o entendeu cando o pediron outras comunidades autónomas", reiterou.