Rueda reunirase este venres con Calviño en Santiago e solicitará "certezas" cos fondos europeos e os Perte

   O presidente da Xunta ve "fundamental" que Altri e Stellantis Vigo reciban financiamento do programa 'Next Generation'

   SANTIAGO DE COMPOSTELA, 9 Jun. (EUROPA PRESS) -

   O presidente da Xunta, Alfonso Rueda, reunirase este venres en Santiago de Compostela coa vicepresidenta primeira do Goberno central, Nadia Calviño, á que solicitará "certezas" na repartición dos fondos europeos 'Next Generation' e na aplicación en Galicia dos Proxectos Estratéxicos para a Recuperación e Transformación Económica (Perte).

   Así o avanzou Rueda, tras a reunión semanal do seu Executivo, nunha comparecencia na que explicou que, aínda que "non hai unha orde do día" establecido para este encontro coa vicepresidenta, o "interese" da Xunta é "falar de proxectos que teñen que ter financiamento europeo".

   Máis en detalle, o presidente galego abordará con Calviño a iniciativa da portuguesa Altri para establecer unha fábrica de fibras téxtiles en Palas de Rei (Lugo), coa que tentará obter apoio financeiro do programa 'Next Generation'.

   Neste contexto, denunciou que o da industria --dotado con 28.000 millóns-- sexa "o único" Perte cuxa distribución "se reservou o Goberno central" na súa totalidade, polo que "non hai Pertes autonómicos" nesta materia. Así a todo, Rueda insistiu en que "non tería ningunha lóxica" que o proxecto de Altri non obtivese os fondos, porque a iniciativa "cumpre todos os requisitos".

"CERTEZAS" PARA STELLANTIS VIGO

   Na mesma liña, o presidente da Xunta reclamou "certezas" para a planta de Stellantis en Vigo, porque os seus novos proxectos "necesitan fondos europeos" igual que se están anunciando "noutros lugares".

   "Acabamos de ver que, no primeiro Perte, Stellantis quedaba fóra nunha gran parte. Eu espero que (Calviño) me dea certezas de que iso non vai ser así e de que terá o apoio dos fondos 'Next Generation'", confiou, xa que aínda hai "26.000 millóns de euros aínda sen asignar e seguen pasando os días".

   E é que estas cuestións son algo "fundamental para Galicia", posto que diso dependen "miles de postos de traballo directos e indirectos".

   En definitiva, Alfonso Rueda espera manter unha "reunión cordial" e "efectiva" coa vicepresidenta económica, a quen pide que "sexa sensible" e poida "concretar" estas partidas. Do mesmo xeito, o titular da Xunta confía en ser recibido "canto antes" polo presidente do Executivo estatal, como así o solicitou tras tomar posesión do cargo o pasado 14 de maio.