Rueda viaxará a Panamá, Venezuela e México este mes de abril para manter encontros institucionais e empresariais

   SANTIAGO DE COMPOSTELA, 2 Abr. (EUROPA PRESS) -

   O presidente da Xunta, Alfonso Rueda, iniciará o vindeiro mércores 12 de abril en Panamá unha viaxe por América que o levará tamén a Venezuela e a México para manter encontros institucionais e empresariais.

   Segundo trasladou a Xunta, o mércores viaxará a Panamá, para chegar a Venezuela o venres 14. O domingo 16 e o luns 17 permanecerá en México, e o martes 18 estará de volta en Galicia.

   Esta será a segunda viaxe ao continente americano de Alfonso Rueda como titular do Goberno galego tras a visita a Arxentina e Uruguai o pasado mes de outubro. Así, un dos obxectivos é "estreitar lazos coa comunidade galega no exterior e erixir un marco de progreso para as próximas xeracións".

   Na axenda do mandatario galego figuran reunións con autoridades, así como con empresarios e investidores interesados nos proxectos económicos e industriais nos que "traballa Galicia para afianzar as súas fortalezas botando man da súa situación estratéxica como ponte entre América e Europa" e das "oportunidades que se presentan en sectores punteiros nos que Galicia ten moito que achegar ao continente americano".

   Así mesmo, Rueda tamén ten previsto reunirse coas asociacións de galegos en Panamá, Venezuela e México para coñecer de primeira man as súas actividades e inquietudes.

   O presidente da Xunta considera "de xustiza" ofrecerlles a oportunidade de volver a Galicia e, con esa intención, informarase ás diferentes xeracións de galegos en América Central e Sudamérica sobre os programas habilitados pola administración autonómica para facilitar o retorno a través da mellora na formación e o acceso ao emprego dos fillos e netos da emigración, articulados ao redor da Estratexia Galicia Retorna 2023-26.