Sanmartín reivindica a súa xestión en Raxoi, mentres que o PSOE pide autocrítica e diálogo e o PP cuestiona que mellorou

Borja Verea afirma que "a unión tripartita gañou as eleccións" e a alcaldesa ironiza: "A vida continúa aínda que o PP non goberne"

   SANTIAGO DE COMPOSTELA, 16 Ene. (EUROPA PRESS) -

   A alcaldesa de Santiago, Goretti Sanmartín, reivindicou no pleno extraordinario de debate do estado do municipio a súa xestión á fronte de Raxoi desde que tomou posesión en 2023, mentres que os socialistas aproveitaron para demandar máis diálogo e autocrítica e o PP cuestionou "que mellorou nos últimos 10 anos de mandato de BNG, Compostela Aberta e PSOE".

   Nunha primeira intervención, a rexedora avanzou que non practicaría "o triunfalismo", senón que falaría "dos obxectivos non alcanzados aínda, pero tamén dos fitos positivos".

   Así, apuntou que o goberno local decidiu "non tapar os ollos e afrontar reformas de calado", renunciando, dixo, "á política cosmética" e "apostando polos cambios profundos" que "son lentos, tardan en verse e non xeran grandes titulares".

   Pola contra, reivindicou a "aposta polo social", así como o "compromiso coa sustentabilidade, os cambios na mobilidade, no modelo turístico, a potenciación da cultura, a lingua e a memoria".

    A nivel de xestión interna, Sanmartín puxo en valor a creación dun comité de simplificación administrativa para axilizar procedementos e facer máis accesible a administración local. Tamén destacou a redución de período medio de pago a provedores, "quedando a finais de decembro en 42 días" e que "a débeda a provedores está por baixo" da herdada, "quedando catro millóns por baixo do anterior".

   Do mesmo xeito, mencionou melloras relacionadas coa cultura, as infraestruturas e a sustentabilidade, entre as que lembrou os avances no programa 'Entre Sar e Sarela' ou o Ecobosque de Conxo.

    Ademais fixo referencia a outros eixos para este 2025 como a vivenda, a implantación da taxa turística ou outras medidas como a cociña central para os centros escolares.

   Sobre as relacións con outras institucións, a alcaldesa subliñou a firma dun acordo marco coa USC ou coa Xunta para o aparcadoiro do Hospital Clínico. Tamén aludiu aos acordos de colaboración coa Deputación para levar a cabo proxectos como a Vía Verde, os proxectos do POS ou a rehabilitación do Estadio Vero Boquete.

"O ANO DO SOCIAL"

   Pola súa banda, a tenente de alcaldesa, María Rozas, destacou que 2024 foi "o ano do social," cun aumento das persoas beneficiarias dos servizos sociais, o novo contrato do Servizo de Axuda no Fogar (SAF), as bolsas de comedor escolar ou o Centro Integral para persoas sen fogar.

   "Será un orgullo que Santiago volva ser vangarda no social, que defende os dereitos de todos os seus habitantes", manifestou Rozas antes de avanzar que nos próximos anos destinarán tres millóns de euros a "un amplísimo programa de formación para o emprego".

O PSOE PIDE DIÁLOGO

   Así mesmo, o portavoz municipal do PSOE, Gonzalo Muíños, puxo en valor que o grupo municipal socialista "demostrou ao longo destes meses que hai sitio para a crítica e para os reproches", pero tamén para "dialogar, acordar e acordar".

   "Temos claro que no lugar no que estamos temos moito que ofrecer, sobre todo cando este ano e medio o que se fixo desde o goberno local foi finalizar os proxectos que nós puxemos en marcha e conseguimos financiamiento", reivindicou.

   Neste punto, lembrou que "a lealdade con Santiago" foi o que os levou a apoiar a ordenanza das vivendas turísticas que causou que a dirección local abrise un expediente ao seis concelleiros do PSOE e reprochou á alcaldesa que no anterior mandato eles "non puideron contar" con ela. "Uns pactabades na oposición para frear o noso concello e nós pactamos para que Compostela avance e progrese", aseverou.

    Así, tras acusar á alcaldesa de "falta de autocrítica" e criticar "fallos na xestión diaria", Muíños pediu diálogo máis fluído cos grupos da oposición e cos veciños, para o que a instou a tomar como referencia a actitude mantida na negociación para os orzamentos.

   Por parte do BNG tomou a palabra o seu portavoz, Míriam Louzao, que defendeu un goberno "traballador" e "eficaz". A continuación, reprochou ao portavoz do PP, Borja Verea que "lle custe dixerir un goberno en minoría". "Exemplar mandato o do PP, con tres alcaldes, para ir probando, e non se cantos concelleiros. É bo que non perdamos a memoria", sinalou a nacionalista.

O PP CUESTIONA AVANCES

   Na súa intervención no pleno, o portavoz do PP, Borja Verea, cuestionou "en que está mellor Santiago que hai dous anos" ou "hai 10 anos", xa que "esta alianza PSOE, BNG E Compostela Aberta esténdese xa durante unha década".

   "Xa me gustaría a min ser alcalde de Santiago, pero a unión tripartita gañou as eleccións por pouco", recoñeceu para, a continuación mirar cara ao futuro e reivindicar que o grupo popular representa xa "unha forza de cambio" que nas próximas eleccións "vai gañar".

   "Esta forza de cambio imparable que representamos quere volver pór Compostela en marcha", apuntou despois de lembrar algunhas das súas propostas electorais para que Santiago "recupere a súa enerxía.

   Tras isto, na súa última intervención, a alcaldesa celebrou "o cambio de discurso do PP". "É a primeira vez que lle escoito ao portavoz do PP que non gañaron as eleccións. A vida continúa aínda que o PP non goberne", expuxo antes de sinalar que "tras aceptar que non tiveron os apoios suficientes, agora pasaron a estar xa en campaña". "Faltan meses para estar no ecuador do mandato, podiamos reservar algunhas cuestións para máis adiante", apostilou.

   Ás cuestións de Verea respondeu tamén na súa segunda quenda a representante de Compostela Aberta, María Rozas, que afirmou que a cidade "si que esta mellor que hai 10 anos". "Reivindico que non dá igual quen goberne. Seguiremos traballando para mellorar Santiago e que os titulares que acaparemos non sexan os que acaparou o goberno de 2015 ao que vostede quere volver, porque fala de que estaba mellor hai 10 anos", censurou, ao que o portavoz do PP reprochou que non tivesen "a elegancia" de expor en que mellorou a cidade nestes 10 anos.

   Tamén respondeu a este respecto Gonzalo Muíños, cuestionando se Galicia está mellor "despois de 15 anos do goberno do PP na Xunta". "Espero ansioso a que faga vostede estas mesmas preguntas tamén no Parlamento galego", relatou.

   Por último, Sanmartín, que agradeceu a "altura de miras" do grupo municipal socialista, expuxo que o consistorio conta con "problemas estruturais graves, aos que se foron pondo parches, medidas que nalgúns casos melloraron algún elemento", pero recoñeceu que "hai que facer medidas de fondo".

PEQUENA LIORTA

   Ao concluír o pleno, a bancada popular pediu quenda de palabra para pedir que se retirase da acta da sesión a palabra 'terapia' --mencionada nun momento do debate pola edil María Rozas respecto de Borja Verea--.

   "Por respecto ás miles de persoas cunha patoloxía de saúde mental", demandaron. A alcaldesa, aínda que recoñeceu que non sabía se se pronunciou esa palabra, aceptou a retirada.

   Tamén houbo queixas durante o debate por parte da portavoz municipal, Míriam Louzao, que pediu que cesasen os comentarios dos concelleiros populares durante a súa primeira intervención. Na súa segunda quenda de palabra, Louzao levou aos edís do PP "dous agasallos": Un libro de Daniel Asorey con ilustracións de Branca Millán, para que "vexan Compostela con outros ollos", e unha pelota antiestrés, "para canalizar a súa frustración".