OURENSE, 22 Jun. (EUROPA PRESS) -
A Xunta puxo en marcha o seu programa de axuda e atención ás vítimas de trata liberadas esta semana nunha operación contra a trata de seres humanos no municipio ourensán do Carballiño.
Así o confirmaron fontes da Consellería de Política Social e Igualdade, que detallaron que a rede galega de casas de acollida, financiada pola administración autonómica, atende nestes momentos ás necesidades das vítimas da organización desarticulada a todos os niveis: psicolóxico, terapéutico e xurídico.
Segundo a lei de Violencia de Xénero de Galicia, e en virtude da reforma do ano 2016, as vítimas de trata son consideradas vítimas de violencia de xénero e poden beneficiarse de todas as prestacións económicas e habitacionais previstas neses casos.
OPERACIÓN
Esta semana transcendía que a Garda Civil liberara a nove mulleres vítimas de trata nunha operación contra a trata de seres humanos levada a cabo no Carballiño.
Segundo confirmou o Instituto Armado, a organización captaba ás vítimas mediante engano, beneficiándose da súa situación de vulnerabilidade. Unha vez se atopaban baixo o control físico dos membros do entramado criminal, retirábanlles a súa documentación e informábanlles de que contraeran unha débeda económica con eles que debía ser satisfeita coa execución de servizos sexuais, baixo ameazas.
Ademais, a organización mantiña "unha sólida xerarquía", cunha repartición de roles "perfectamente definidos" no relacionado á captación, traslado e explotación final.
As detencións foron practicadas no Carballiño, Ourense, A Coruña e Madrid. Dentro da fase de explotación, a Garda Civil realizou seis entradas e rexistros en diferentes lugares da provincia ourensá.
O xuíz do Xulgado de Instrución número 1 do Carballiño, en funcións de garda, decretaba este xoves a prisión provisional, comunicada e sen fianza, para cinco dos oito detidos nesta operación. Para outros dous, determinou o ingreso en prisión, eludible baixo fianza; e, para un dos arrestados, a súa posta en liberdade.
A todos eles investígaselles por delitos de trata de seres humanos con fins de explotación sexual, con participación en organización criminal, e branqueo de capitais.
Andalucía
