A Xunta avisa ao Goberno que "non se pode estar tres anos sen orzamento" e presentará o seu o 20 de outubro

SANTIAGO DE COMPOSTELA, 24 Sep. (EUROPA PRESS) -

O conselleiro de Facenda, Miguel Corgos, avisou de que "non pode estar un Goberno tres anos sen orzamento", despois de que o Executivo de Pedro Sánchez atrasase a tramitación no Congreso da senda de déficit.

En declaracións a Europa Press antes de participar nun acto en Santiago, o responsable das contas públicas galegas constatou que este adiamento é "consecuencia lóxica da falta de apoios" de Sánchez.

Ao seu xuízo, "demostra" o que a Xunta de Alfonso Rueda "vén dicindo". "Que é importante ter orzamento. Non pode estar un Goberno tres anos sen orzamento. Se non se aprobaba a senda de déficit sería practicamente imposible seguir avanzando cara á elaboración das contas públicas da administración xeral do estado", incidiu Corgos.

Por iso remarcou que "é preciso acordar estas sendas, para que se poidan aprobar, con todos os trámites que esixe a lei de estabilidade orzamentaria, e poder seguir a tramitación orzamentaria, que non está garantida aínda que teñas a senda". Pero "sen senda", apostilou, "desde logo, non pode haber orzamento".

Pola súa banda, afirmou que o Goberno autonómico vai "continuar coa elaboración" das súas contas e vai presentar " o orzamento o 20 de outubro, como sempre".