SANTIAGO DE COMPOSTELA, 14 Mar. (EUROPA PRESS) -
A Consellería de Facenda destacou que Galicia pechou 2013 cun endebedamento, do 16,6% do PIB, que está 3,6 puntos por debaixo da media das comunidades e que mantivo estable a cifra respecto ao terceiro trimestre.
Nun comunicado, o Goberno galego indicou que a media das comunidades se situou no 20,2% e que Galicia se situou no grupo de comunidades con menos ratio. En total, a débeda ascendeu un 0,3% en relación ao trimestre anterior e situouse en 9.131 millóns de euros.
Os datos publicados polo Banco de España este venres mostran, agrega Facenda, que "Galicia non só conseguiu ampliar este diferencial positivo, senón que mellorou as súas previsións iniciais de evolución comparativa de endebedamento para 2013", posto que a estimación era pechar tres puntos por debaixo da media.
A Xunta resalta tamén a evolución en 2013, ano no que a comunidade pasou dun diferencial de 1,3 puntos ao inicio aos 3,6 do peche e no que arrancou como a décima segundo o peso da débeda e finalizou como a sétima.
En canto á débeda das empresas públicas, a Xunta sinala que "tampouco incrementou no cuarto trimestre a débeda", o que "pon en evidencia a aposta" pola transparencia da administración galega". Se se ten en conta esta débeda, o endebedamento de Galicia é 4,2 puntos inferior á media, apunta.
O Goberno galego atribúe o aumento deste diferencial positivo a que Galicia "non necesitou nin un solo euro dos mecanismos de axuda habilitados polo Estado" e a súa "solvencia" permítelle acceder aos mercados "en condicións vantaxosas".
"Galicia está a distribuír as súas operacións a uns tipos de interese moi competitivos e inferiores aos do fondo de liquidez autonómica (FLA)", incidiu e recordou que na última operación colocou a súa débeda un tipo do 1,89%, "o máis baixo da historia da autonomía".
Andalucía
