A Xunta mostra "preocupación" por unha condonación "inequitativa" de débeda a algunhas comunidades

   O conselleiro de Facenda sinala que é un "elemento nuclear" do financiamento autonómico e demanda que se negocie de forma conxunta, non "bilateral"

   SANTIAGO DE COMPOSTELA, 1 Ago. (EUROPA PRESS) -

   O conselleiro de Facenda, Miguel Corgos, mostra "preocupación" por que o Goberno poida realizar unha condonación de débeda a algunhas comunidades, o que considera que sería unha medida "inequitativa". Así, remarca que "este é un elemento nuclear do sistema de financiamento" e reclama que se negocie de forma conxunta no seo do Consello de Política Fiscal e Financeira (CPFF).

   Nun audio remitido aos medios este martes, o conselleiro de Facenda sinala que, aínda que "parece que se está falando de condonación, o que se está propondo é unha mutualización da débeda, é dicir, repartir a débeda dalgunhas comunidades autónomas que se estima que están demasiado endebedadas entre todas as comunidades autónomas, entre todo o Estado". Unha cuestión que provoca "incentivos perversos", posto que algunhas autonomías "teñen demasiada débeda porque no seu día gastaron máis, por riba da súa capacidade".

   A ministra de Facenda en funcións e 'número dous' do PSOE, María Jesús Montero, asegurou o pasado luns que é "precipitado" falar neste momento de condonar unha parte da débeda a Cataluña a cambio do apoio dos partidos independentistas á investidura de Pedro Sánchez. Afirmaba que "é precipitado anticipar ou trasladar ningunha cuestión da que os diferentes grupos poidan expor", en relación á información publicada por 'El Mundo' que asegura que o PSC ofreceu aos partidos independentistas condonar unha parte da débeda do Fondo de Liquidez Autonómica (FLA).

   Corgos censura que "agora van repartir o exceso da débeda entre as demais que si que cumpriron cos seus obxectivos de estabilidade e, por tanto, existe aí un certo risco reputacional interno", así como "tamén externo porque os investigadores internacionais están a ver que neste país o tema das regras fiscais non se cumpre exactamente". "Se sistematicamente te excedes do teu obxectivo de déficit, podes solicitar unha condonación dese endebedamento", agrega.

   Así mesmo, Corgos opina que "é un tema realmente complexo", xa que "o financiamento da débeda contra o FLA non é homoxénea en todas as comunidades autónomas". E é que estima que o endebedamento colocado ao FLA vai entre un 0% e un 93% en función das comunidades.

   Por tal motivo, o responsable de Facenda remarca que os expertos consideran que esta é unha das "arestas" do sistema de financiamento autonómico que debe negociarse "de modo multilateral entre todas as comunidades autónomas xunto coa Administración Xeral do Estado", polo que "non pode ser obxecto dunha negociación bilateral".

   E é que lembra que, do mesmo xeito que algunhas autonomías poden solicitar esa quita, outras como Galicia teñen como "principal preocupación" que se valoren os custos da prestación de servizos públicos fundamentais, "en particular os sobrecustos motivados pola dispersión e o envellecemento". "Todo isto debe ser obxecto dunha negociación conxunta, en termos de igualdade, porque todos temos o mesmo dereito a que se solucionen os nosos problemas, e non por fascículos, primeiro en función das necesidades políticas da conformación de goberno", avisa.