VIGO, 1 Oct. (EUROPA PRESS) -
A ministra de Traballo e vicepresidenta segunda do Goberno, Yolanda Díaz, desvelou este sábado a detección de "abusos contractuais" logo de inspeccións a case un centenar de empresas do sector da conserva en Galicia antes de que entrase en vigor a reforma laboral do actual Executivo.
Así o explicou en declaracións aos medios antes de participar nun encontro organizado por CC.OO. en Vigo sobre as condicións laborais das traballadoras do sector da conserva e produtos elaborados do mar.
Yolanda Díaz explicou que, do mesmo xeito que noutros sectores produtivos, a Inspección de Traballo levou a cabo investigacións sobre as condicións laborais nesta industria. Así, antes da entrada en vigor da reforma laboral do pasado ano, levantáronse actas de inspección en 97 empresas galegas de conservas de peixe.
Tratábase de empresas que sumaban case 2.500 traballadores, dos que o 81 % eran mulleres, e "foron corrixidas por presuntas irregularidades, algunhas confirmadas", xa que "se abusaba da precariedade". Así, detectáronse "abusos contractuais", como uso irregular de determinadas modalidades de contrato, que se resolveron, pasando a ser contratos indefinidos.
O PP "PRECARIZABA AS ACTIVIDADES CON NOME DE MULLER"
Yolanda Díaz incidiu en que o conserveiro é un sector "profundamente feminizado" e que a reforma laboral do PP, con Rajoy á fronte, "foi pensada contra as mulleres, tiña impacto de xénero", porque "precarizaba especialmente as actividades con nome de muller", como é o caso desta industria.
"Foi unha reforma para empobrecer e baixar salarios e, neste caso, aínda máis, das mulleres que xa tiñan moi baixos salarios", aseverou a vicepresidenta segunda, que engadiu que "isto é o que está a corrixir a reforma do ano pasado, que tamén ten impacto de xénero, pero en positivo".
Con todo, Yolanda Díaz recoñeceu que "queda moito por facer para dignificar sectores coma este", onde o traballo é "deficientemente valorado e deficientemente retribuido".
Respecto diso, incidiu en que o Ministerio de Traballo e Economía Social seguirá avanzando para, entre outras cousas, que se recoñezan as enfermidades profesionais dun colectivo de mulleres que desenvolve a súa actividade en condicións "extremas" de frío ou humidade. "As enfermidades profesionais teñen un sesgo de xénero e, neste caso, é evidente", apuntou.
Precisamente este venres, nun encontro con mariscadoras en Vilagarcía de Arousa, avogou por revisar o catálogo de enfemerdades profesionais, para recoller as doenzas das traballadoras do mar.
Por outra banda, a ministra volveu a ser preguntada este sábado pola actuación do Goberno fronte ao veto da UE á pesca de fondo en 87 zonas de augas comunitarias, e Yolanda Díaz volveu a sinalar que o Executivo defenderá "os intereses" de España, aínda que debe ser "o ministro competente" o que se pronuncie respecto diso.
Andalucía
