A Xunta esgrime que a intervención do Concello dos Blancos (Ourense) por parte da Deputación é "necesaria"

PONTEVEDRA 12 Dic. (EUROPA PRESS) -

O vicepresidente da Xunta, Alfonso Rueda, manifestou este martes que "todo parece indicar" que a intervención do Concello dos Blancos, que cederá varios servizos á Deputación, é "necesaria" dado que a súa situación económica é "delicadísima".

En declaracións aos medios en Pontevedra, Rueda lembrou que "é un mecanismo que está previsto na lei" e que, seguindo ese procedemento, unha vez solicitada a autorización, "a Xunta de Galicia analizará os datos que lle achegue a Deputación respecto ao Concello dos Blancos e emitirá o seu parecer".

"Algúns datos xa os coñecemos porque mantivemos reunións durante estes anos pasados co propio Concello dos Blancos e coa Deputación de Ourense", esgrimiu Rueda, quen apuntou que a débeda, principalmente coa Administración Xeral do Estado, "supera con moito o orzamento de cada ano".

Por iso, remarcou que, se non se impulsa algún tipo de intervención para paliar esta situación, "a viabilidade do concello sería imposible".

PROCEDEMENTO LEGAL

O vicepresidente galego engadiu respecto da actuación da Administración provincial que "todo parece indicar que está a cumprir coa súa obrigación e cumprindo cun procedemento que está na Lei".

Ademais, destacou que esta é unha das funcións que teñen que cumprir as deputacións. "E creo que a Deputación de Ourense con este paso dá un exemplo de que as deputacións están especialmente para atender aos pequenos municipios e para solucionar os problemas, mesmo cando son tan límites como os dos Blancos", concluíu.